KAN FORÅRSAKE KREFT: Kvartshaldig steinstøv kan forårsake mellom anna lungekreft, allergi og KOLS. Arbeidstilsynet gjennomfører tilsyn for å førebygge at arbeidstakarar blir utsette for farleg steinstøv. Foto: Colourbox
Arbeidstilsynet gjorde rundt 100 tilsyn med steinstøv i 2024. I gjennomsnitt avdekte vi brot i 80 prosent av tilsyna.
– Dei førebyggande tiltaka er ofte ikkje tilstrekkelege. Det gir ein høg risiko for at arbeidstakarar blir eksponerte for det farlege kvartsstøvet. Derfor aukar vi no innsatsen mot steinstøv. I 2025 har vi planlagt 200 tilsyn med steinstøv, seier direktør i Arbeidstilsynet, Ingvill Kvernmo.
Manglar tiltak hos halvparten av verksemdene
Arbeidstilsynet gjennomfører tilsyn for å førebygge at arbeidstakarar blir utsette for farleg steinstøv. Tilsyna viser at 48 prosent av verksemdene ikkje har gjennomført tilstrekkelege tiltak for å fjerne eller redusere helserisikoen knytt til farleg steinstøv
– Fleire av tiltaka krev betre utstyr og rutinar, for at arbeidstakarane skal kunne utføre arbeidsoppgåvene på ein forsvarleg måte. Dette er ei utfordring som bransjen og byggherrar må ta innover seg, seier Kvernmo.
Samtidig understrekar ho at Arbeidstilsynet har god dialog med bransjen, og opplever at fleire utstyrsleverandørar ønsker å utvikle gode løysingar i samarbeid med bransjen.
– Inspektørane våre melder også tilbake om at fleire verksemder er i gang med gode prosessar for å redusere eksponeringa av steinstøv, seier Kvernmo.
Varslar lovbrotsgebyr
Sjølv om regelverket for å førebygge eksponering av farleg steinstøv er tydeleg, er det framleis for mange verksemder som ikkje har gode nok tiltak for å førebygge at arbeidstakarane blir eksponerte for steinstøv.
– Vi ser at det no er nødvendig å stramme til reaksjonsbruken og vurderer fortløpande lovbrotsgebyr når vi avdekker alvorlege og omfattande brot. Ved særleg alvorlege brot vil vi politianmelde forholda, seier direktør Ingvill Kvernmo.
– Dette kan for eksempel vere ved gjentakande brot knytt til internkontroll og manglande tiltak for eksponering av farleg steinstøv, utdjupar Kvernmo.
Utset lovbrotsgebyr for fjerning av steinstøv
Arbeidstilsynet ser at ein stor del av anleggsverksemdene foreløpig ikkje har utstyr som sikrar tilstrekkeleg fjerning av steinstøv. For å gi dei anledning til å skaffe nødvendig utstyr, maskiner og tenester, vil det vere ein overgangsperiode, men frå 1. januar 2026, vil også brot knytt til tilstrekkeleg avsug og fjerning av steinstøv bli vurdert for lovbrotsgebyr.
Arbeidstilsynet vil også gjennomføre tilsyn med byggherrar, for å kontrollere at byggherren tar ansvaret sitt etter byggherreforskrifta, med konkrete tiltak i SHA –planen (plan for tryggleik, helse og arbeidsmiljø).
Fakta om kvarts
- Krystallinsk silika, også kalla kvarts, er eit av dei vanlegaste minerala i jordskorpa, og finst i varierande mengder i dei fleste bergartar, sand og leire.
- Eksponering for kvarts skjer i hovudsak ved innanding av støv ved handtering av kvartshaldig stein og sand som ved gruvedrift, ved fjellboring, ved knusing, kutting og rivning av stein og betong og i tunnel-, anleggs- og bygningsverksemd.
- Noreg fastsette i 2021 ein ny grenseverdi for respirabelt krystallinsk silika på 0,05 mg/m3.
- Det grøne skiftet fører til eit større fokus på at bygningar skal rehabiliterast i staden å rivast og byggje nytt. Dette fører til meir innvendig riving og bearbeiding av eksisterande bygningsmasse som ofte består av betong og murstein. Byggjemateriale som murstein og betong kan innehalde opptil 30% av mineralet kvarts.
Fakta om helserisiko knytt til kvarts
- Helserisikoen ved kvarts er først og fremst knytt til innanding av støv som blir danna når materiale blir omarbeidde slik at små partiklar blir frigjorde.
- Det er dei minste steinstøvpartiklane som treng lengst ned i lungene som er farlegast. Dei minste partiklane blir kalla respirable, og er så små at dei ofte ikkje kan sjåast med berre auga.
- Kvartsstøv er kjent for å forårsake silikose, fall i lungefunksjon, astma, allergi og KOLS.
- Respirabelt kvartsstøv er også kreftframkallande og kan føre til lungekreft. I tillegg kan kvartsstøv gi akutte helseplager som hoste, slim og sårheit i luftevegane.
Hvordan redusere støveksponering
Tekniske tiltak for å redusere støveksponering:
- Arbeidsutstyret er i samsvar med regelverket og utstyrt med oppsamlingssystem
- Lukka førarhytte med HEPA-filter og overtrykk
- Vatning for å dempe støvet
Organisatoriske tiltak handlar om god planlegging, organisering og tilrettelegging av arbeidet:
- Samtidig arbeid og opphald i forureina soner må avgrensast
- Det er viktig med gode rutinar for drift, vedlikehald og reinhald
- Arbeidstakarane må få opplæring i gode arbeidsvanar, som til dømes å ikkje dra med støv inn i førarhytte eller på eterom/anleggsbrakke, og å lukke vindauge i førarhytte.
